ਬਰਨਾਲਾ ਸਿਟੀ ਪੁਲਿਸ ਦੀ ਕਾਰਜਪ੍ਰਣਾਲੀ ’ਤੇ ਹਾਈ ਕੋਰਟ ਦੀ ਸਖ਼ਤੀ: ਐੱਸਐੱਸਪੀ ਨੂੰ ਜਾਂਚ ਅਧਿਕਾਰੀ ਦੀ ਆਚਰਨ ਦੀ ਜਾਂਚ ਕਰਨ ਦਾ ਹੁਕਮ

ਹਾਈ ਕੋਰਟ ਨੇ ਮੰਗੀ 4 ਹਫ਼ਤਿਆਂ ’ਚ ਰਿਪੋਰਟ
ਬਰਨਾਲਾ, 28 ਅਗਸਤ : ਪੰਜਾਬ ਤੇ ਹਰਿਆਣਾ ਹਾਈ ਕੋਰਟ ਨੇ 1.39 ਕਿਲੋ ਹੈਰੋਇਨ ਬਰਾਮਦਗੀ ਦੇ ਮਾਮਲੇ ਚ ਮੁਲਜ਼ਮ ਨੂੰ ਨਿਯਮਤ ਜ਼ਮਾਨਤ ਦਿੰਦਿਆਂ ਪੁਲਿਸ ਜਾਂਚ ’ਤੇ ਸਵਾਲ ਚੁੱਕੇ ਹਨ। ਅਦਾਲਤ ਨੇ ਬਰਨਾਲਾ ਦੇ ਐੱਸਐੱਸਪੀ ਨੂੰ ਜਾਂਚ ਅਧਿਕਾਰੀ ਦੇ ਆਚਰਨ ਦੀ ਜਾਂਚ ਕਰਵਾ ਕੇ ਚਾਰ ਹਫ਼ਤਿਆਂ ਅੰਦਰ ਕਾਰਵਾਈ ਕਰਨ ਦੇ ਹੁਕਮ ਦਿੱਤੇ ਹਨ। ਜਸਟਿਸ ਸੰਜੇ ਵਸ਼ਿਸ਼ਠ ਨੇ 25 ਸਾਲਾ ਮੁਲਜ਼ਮ ਦੀ ਪਟੀਸ਼ਨ ਤੇ ਇਹ ਹੁਕਮ ਦਿੱਤਾ। ਬਰਨਾਲਾ ਸਿਟੀ ਥਾਣੇ ਚ 11 ਦਸੰਬਰ 2025 ਨੂੰ ਐੱਨਡੀਪੀਐੱ  ਐਕਟ ਤਹਿਤ ਕੇਸ ਦਰਜ ਕੀਤਾ ਗਿਆ ਸੀ। ਪੁਲਿਸ ਮੁਤਾਬਕ ਉਸ ਰਾਤ ਗੁਪਤ ਸੂਚਨਾ ਮਿਲੀ ਸੀ ਕਿ ਤਿੰਨ ਵਿਅਕਤੀ ਚਿੱਟੀ ਐਸਯੂਵੀ ਚ ਹੈਰੋਇਨ ਲੈ ਕੇ ਜਾ ਰਹੇ ਹਨ। ਨਾਕਾ ਲਾ ਕੇ ਗੱਡੀ ਰੋਕੀ ਗਈ ਤਾਂ ਉਸ ਚ ਸਿਰਫ਼ ਦੋ ਵਿਅਕਤੀ ਮਿਲੇ। ਡਰਾਈਵਰ ਦੀ ਸੀਟ ਹੇਠੋਂ 1.39 ਕਿਲੋ ਹੈਰੋਇਨ ਬਰਾਮਦ ਹੋਣ ਦਾ ਦਾਅਵਾ ਕਰਦਿਆਂ ਦੋਵਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ। ਬਾਅਦ ਚ ਪੁਲਿਸ ਨੇ ਦੋਸ਼ ਲਾਇਆ ਕਿ ਜਦੋਂ ਬਰਾਮਦ ਨਸ਼ੀਲੇ ਪਦਾਰਥ ਤੇ ਗ੍ਰਿਫ਼ਤਾਰ ਮੁਲਜ਼ਮਾਂ ਨੂੰ ਅਦਾਲਤ ਲਿਜਾਇਆ ਜਾ ਰਿਹਾ ਸੀ ਤਾਂ ਇਕ ਵਿਅਕਤੀ ਉੱਥੇ ਆਇਆ। ਗ੍ਰਿਫ਼ਤਾਰ ਮੁਲਜ਼ਮਾਂ ਚੋਂ ਇਕ ਨੇ ਉਸ ਦੀ ਪਛਾਣ ਸਹਿ-ਮੁਲਜ਼ਮ ਵਜੋਂ ਕੀਤੀ। ਪਟੀਸ਼ਨਰ ਦੇ ਵਕੀਲ ਨੇ ਕਿਹਾ ਕਿ ਗ੍ਰਿਫ਼ਤਾਰੀ ਸਮੇਂ ਉਸ ਕੋਲੋਂ ਕੋਈ ਨਸ਼ੀਲਾ ਪਦਾਰਥ ਨਹੀਂ ਮਿਲਿਆ ਤੇ ਅਗਲੀ ਜਾਂਚ ਦੌਰਾਨ ਵੀ ਕੋਈ ਬਰਾਮਦਗੀ ਨਹੀਂ ਹੋਈ। ਅਦਾਲਤ ਨੇ ਕਿਹਾ ਕਿ ਇਸ ਮਾਮਲੇ ਚ ਇਸਤਗਾਸਾ ਪੱਖ ਦੀ ਕਹਾਣੀ ਨੂੰ ਹਾਲੇ ਸਬੂਤਾਂ ਦੀ ਕਸੌਟੀ ਤੇ ਪਰਖਿਆ ਜਾਣਾ ਬਾਕੀ ਹੈ। ਹਿਰਾਸਤ ਸਰਟੀਫਿਕੇਟ ਮੁਤਾਬਕ ਮੁਲਜ਼ਮ 15 ਅਗਸਤ ਤਕ ਅੱਠ ਮਹੀਨੇ ਤਿੰਨ ਦਿਨ ਜੇਲ੍ਹ ਚ ਰਹਿ ਚੁੱਕਾ ਸੀ। ਅਦਾਲਤ ਨੇ ਜ਼ਮਾਨਤ ਮਨਜ਼ੂਰ ਕਰਦਿਆਂ ਕਿਹਾ ਕਿ ਉਸ ਨੂੰ ਅਣਮਿੱਥੇ ਸਮੇਂ ਤਕ ਹਿਰਾਸਤ ਚ ਰੱਖਣ ਦਾ ਕੋਈ ਲਾਭਦਾਇਕ ਮਕਸਦ ਨਹੀਂ ਹੋਵੇਗਾ। ਇਹ ਕੇਸ 25 ਸਤੰਬਰ ਨੂੰ ਮੁੜ ਸੁਣਵਾਈ ਲਈ ਸੂਚੀਬੱਧ ਕੀਤਾ ਗਿਆ ਹੈ।